Основна мисија на Книгоиздателството "Ми-Ан" е на читателот да му приопшти издавачки проекти кои ќе придонесат, од една страна, за збогатување на македонскиот културен простор, но и ќе извршат одредено расветлување на Македонија, македонската култура и духовност надвор од границите на Републиката. Токму затоа, голем дел од своите проекти, Ми-Ан ги печати двојазично, на македонски и англиски јазик.
Книгоиздателството "Ми-Ан" е едно од најстарите приватни книгоиздателства во Македонија, регистрирано уште во 1992 година, веднаш по одлуката на Владата на Република Македонија, со која се овозможува формирање на приватни издавачки куќи и во сферата на издавачката дејност.
Книгоиздателството "Ми-Ан", ги издава информативно политичките гласила Македонско време и The Macedonian Times, први месечни њузмагазини во земјата, печатени на македонски и англиски јазик. Македонско време е њузмагазин кој третира содржини поврзани со минатото и сегашноста на Македонија, исклучително убаво примен од интелектуалната и политичката средина во земјата, за што зборува и неговиот тираж - Македонско време се печати во 4.000 примероци, кои се дистрибуираат во земјата и во странство. The Macedonian Times е месечник посветен, главно, на странските државјани кои престојуваат во земјава, со содржини кои на гостите на Македонија и Скопје ќе им го приближат од економски, културен, забавен, историски и секаков друг аспект.
Издавањето книги е уште една значајна дејност на "Ми-Ан". Главната ориентација на Книгоиздателството е на читателот да му се понудат книги кои ја третираат историјата на Македонија, како и општите културни и цивилизациски вредности. Во таа насока, во подготовка се неколку едиции во кои ќе бидат приопштени значајни проекти кои ги опфаќаат човековите права, економијата, социологијата политикологијата и сл.
"Ми-Ан" е, исто така, еден од пионерите на македонското електронско издаваштво. Меѓу другите, Книгоиздателството ја подготви и првата Интернет антологија на македонската поезија, како и сајтот Национални паркови во Македонија.